امتحان الثانوية العامة كل واحد عينه في ورقته واللى يبص جنبه ياخد 8 غرز في وشه اجب على كل الاسئلة اللى جاية ولا حول ولا قوة الا بالله
أولا التعبير :- اكتب ما لايقل عن 650 سطر فى أحد الموضوعات التالية لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة ...
شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 9000جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز...
بعد انتشار ظاهرة أكل لحم الكلاب والحمير..من وجهة نظرك تكلم عن هذه الظاهرة ومن المتسبب فيها بدون غلط..الورق متراقب ـــــــــــــــــ... السؤال الثانى: القصة من قصة ' وعهد الله ما انت داخل الانتخابات' .. اقرأ القطعة وأجب عن الآتى ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟
ما هى اللحمة؟ أو على الأقل حدد أقرب معنى خيالى لها؟
مرادف معجزة فى اللغة ( تغيير وزارى – زيادة المرتبات – رغيف العيش ) اختر الاجابة اللى انت شايفها ده ول انت لسة شايف قدامك اساسا ؟
لماذ ضربه الرجل بالجزمة وليس بالعصى مثلا؟؟ أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى اختر
حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا ـــــــــــــــــ... السؤال الثالث القراءة من موضوع ( الزعيم..والفنان.. والقدوة) اقرأ القطعة وأجب وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة
فى رأيك هل يصلح عادل إمام لوزارة الثقافة أم لوزارة الصناعة باعتبار أنه صرح فى فيلم السفارة فى العمارة أنه بيحب المَكَن
دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
أكيد معزوم – طبيعى معزوم – وربنا معزوم.. ـــــــــــــــــ... السؤال الرابع النصوص أجب عن أحد النصين الآتيين من نص ( ماشربتش من نيلها)..اقرأ ثم أجب ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها
بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
المسيسبى - الأمازون – يونج يانج
أكمل الأبيات إلى آخر كحكة فى الكليب
قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى ما الجمال في قوله جربت تغنيلها من وجهة نظر سيادتك ؟ وهل تعتقد انك لو غنيت الدنيا هتبقى حلوة ؟؟ ـــــــــــــــــ...من نص (حين ميسرة)..أجب عن الآتى
اذكر اسم مصيبة واحدة محصلتش فى النص الأسود ده
وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر . كمبيوتر إرهابى بقى
سبب وجود الشرطة كل خمس دقائق فى النص
موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص اختر ـــــــــــــــــ... السؤال الخامس النحو
أعرب ما تحته خط.. لو مالقيتش القطعة أصلا ..اتصرف
ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا ياكلب
كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده
فُرِضت الضرائب علينا ببشاعة ..أعرب الجملة .. وارفع الضرائب أبوس إيدك ـــــــــــــــــ... السؤال السادس الخط
كوز المحبة انخرم..طرطش على كمى..ياحبيبى بطل جفا وارحم عذاب ………
اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء
مع ارق تمنياتنا بالنجاح والتوفيق في ظل مصرنا الحبيبة
موضوع: أمتحــــــــــــان لغـــــــــه عربيه ثانويـــــــــه عامه 2008 للمرحلتين الأولي والتانيه 
السبت يونيو 21, 2008 1:29 pm